Le rejection del Constitution Europee per le citatanos de Francia e Nederland ha ducite Europa a un crisis. Nunquam in le historia il ha essite un debatto tanto intense super le futuro de Europa. Iste debatto debe esser continuate in un forma plus profunde. Le alte participation a iste duo referendums monstra que le citatanos vole haber un rolo active in le questiones europee. Isto presenta le opportunitate de startar un ver processo de apprentissage. Primarimente nos debe comprender le rationes del rejection, a fin de augmentar le chances de acceptation in le futuro. Un del major rationes pro le rejection del Constitution Europee es le manco de fiducia del citatanos in le institutiones europee. Illos es percipite como frigide e distante, proque le decisiones in le passato super le integration europee ha activemente excludite le citatanos. Ab hodie le decisiones major non plus pote esser prendite solmente per le diplomates e le capites de stato, ma illos debe esser prendite per le citatanos ipse.

Le prime Convention ha facite alcun passos promittente in le direction de un plus grande participation del citatanos. Totevia, si nos lo reguarda de un perspectiva democratic, iste processo esseva ancora lontan de esser satisfactori. Il es del citatanos que debe emanar le mandato del Convention. Solo un Convention de legitimitate democratic pote producer un projecto de tractato que pote ganiar le fiducia del citatanos. Pro iste ration nos demanda le creation de un Convention e un processo de ratification genuinmente democratic. Iste processo debe continer le elementos sequente:

Tote le membros del Convention debe esser eligite directemente per le citatanos. Le questiones a resolver pote includer qui pote presentar se como candidato e quante candidatos debe haber cata pais. Il es necessari que un ample spectro de punctos de vista es representate.

Le nove Convention debe reunir se e prender su decisiones publicamente. Le presidentia, que preside le proceso, debe esser eligite per le Membros del Convention. Le qualitate del processo non debe esser compromittite per limitationes de tempore.

Citatanos individual o in gruppo, Organisationes Non Governamental, etc. debe poter presentar propositiones al Convention, que debe esser prendite in consideration. Iste procedura facera multo probabile que le proposition final es acceptate per le citatanos. Le Convention debe presentar su conclusiones provisori in le forma de un serie de optiones basic. Postea iste alternativas debe esser debattite publicamente in foros appropriate (pro exemplo, conferentias de citatanos).

Le carga principal del Convention debe esser analysar le diverse optiones e trovar un solution que es capabile de garantir un majoritate inter le citatanos de Europa. Un constitution es solo un option inter altere possibile typos de accordo pro le Futuro de Europa.

Le proposition final elaborate per le Convention debe esser submittite a un referendum.

Le referendum debe haber loco le mesme die in tote le statos membros.